Memorandým qorshaǵan ortanyń sapasyn jaqsartý, ekologııalyq qaýipsizdikti qamtamasyz etý jáne yntymaqtastyqty nyǵaıtýǵa baǵyttalǵan. Qujatqa sáıkes, QMG enshiles kásiporyndary – «Qarajanbasmunaı» AQ, «Mańǵystaýmunaıgaz» AQ jáne «О́zenmunaıgaz» AQ – kelisimshart aýmaqtary sheginde munaımen lastanǵan jerlerdi tazalaý, sondaı-aq jabdyqtalmaǵan shlam jınaǵyshtarynda ornalastyrylǵan qaldyqtardy kádege jaratý jáne qaıta óńdeý jónindegi mindetterdi qabyldaıdy. Mańǵystaý oblysynda munaı ken oryndaryn paıdalaný ótken ǵasyrda bastalǵanyn atap ótken jón, bul munaımen lastanǵan aýqymdy jerlerdiń paıda bolýyna ákelip soqty (túrli óndiris qaldyqtary jáne eski munaı tógilýleri). Qazirgi ýaqytta QMG kompanııalary toby tarıhı lastanǵan jerlerdi kádege jaratý týraly sheshim qabyldady.
Memorandýmǵa sáıkes QMG óziniń enshiles jáne táýeldi uıymdarymen birlesip, ekologııalyq talaptar men standarttardyń mindetti saqtalýyn qamtamasyz etedi, kelisimshart aýmaqtarynda qaldyqtardy túgendeıdi, qaldyqtardy qaıta óńdeý, munaımen lastanǵan jerlerdi qalpyna keltirý boıynsha ozyq ádister men ekologııalyq qaýipsiz tehnologııalardy engizedi. Sondaı-aq, qaldyqtardy qaıta óńdeý ónimderin (tazartylǵan topyraq) keıinnen sharýashylyq qyzmette paıdalanýdy qamtamasyz etedi.
Ekologııa mınıstrligi óz kezeginde ekologııalyq zańnama talaptarynyń saqtalýyna baqylaý júrgizedi, QMG kompanııalar toby qyzmetiniń qorshaǵan ortaǵa jaǵymsyz áserin azaıtý jónindegi sharalardyń iske asyrylýyn úılestiredi. Ekologııa, geologııa jáne tabıǵı resýrstar mınıstri Maǵzum Myrzaǵalıevtiń aıtýy boıynsha, Qazaqstanda alǵash ret kompanııa ózine mundaı kólemdegi mindetterdi qabyldaýda.
«Bul qujatty iske asyrý elimizdiń batysyndaǵy munaımen lastanǵan jerlerdi edáýir tazartýǵa, óńirdiń jaǵymdy ekologııalyq ahýalyn qoldap turýǵa múmkindik beredi. Sondaı-aq, Mınıstrlik qorshaǵan ortany qorǵaýǵa baǵyttalǵan tutas bir sharalar keshenin oryndaýdy josparlap otyr», - dep atap ótti M. Myrzaǵalıev.
«QazMunaıGaz» kompanııalar tobynyń qyzmeti qorshaǵan ortaǵa áser etýimen tikeleı baılanysty. Sol sebepti biz elimizdiń baıtaq tabıǵatyn, tabıǵı resýrstardy saqtaýǵa, qorshaǵan ortanyń tarıhı lastanǵan jerlerin joıýǵa, qaldyqtardy azaıtýǵa múddelimiz. Búgingi memorandým Ekologııa mınıstrligimen kúsh-jigerimizdi biriktirip, «QazMunaıGaz» qyzmetin júrgizetin óńirlerde ekologııalyq ahýaldy barynsha jaqsartýǵa múmkindik beredi, dedi QMG Basqarma tóraǵasy Alık Aıdarbaev.
Mańǵystaý oblysy
